أحلى من الشرف ما فيش

0

أحلى من الشرف ما فيش
==============
وسط شبُّورة دُخَّان و طرق قطع الدومينو و نقر زهر اللعب على الطاولات جَلَسَ الكُهُول الأربَعَة كَعَادَتِهم يشربون الشيشة و يتجاذبون أطراف الحديث..
دَروِيش حَيرَان، و شَعبِوُ النَّايِم، و جَبَنَاَوِي قَـفـا، و دَيُوسِي النُّوُرِي، و بين فينة و أخرى يمر عليهم “الواد عَبدُه غَبَاَ القهوجي”، ليغير حجر الشيشية..

* دَروِيش حَيرَان /
* الواد ابني امبارح راجع من الجامعة يشتِم في حربية، رحت هابده كف، الواد عَـيَّط و جاب اللابتوب و وراني ييجي خمسين فيديو لحربية و هيا بتخون…بصراحة جالي ذهول..
* تصوروا كل السنين دي عايشة معانا، و واثقين فيها و بنسلمها عيالنا علشان تعلمهم الرجولة و في الآخر اكتشف إنها مُلْعَبْ؟!…و مع يهودي نتن…….ياهووووه..
* في “67” قلنا اغتصبوها غصب عنها و اتسترنا عليها، و لما كسرت دراع اليهودي في “73” ، مع إن كان الواجب تقتله، و رغم إنه اتحرش بيها و شَلَّحهَا في الثغرة، اعتبرناها ردت شرفها و قولنا عملت اللي قِدرِت عليه..
* و في 78 لما وافقت إن ديفيد يعمل كامب جنبنا و قالتلنا إن ده في مصلحتنا، ما شكيتش فيها ولا ظنيت إن بينها و بينه أي علاقة سرية..
* كل يوم بنروح شُغلِنا و نِشقَى و نجمعلها من كَدِّنا و معتبرين البيت في حمايتها و مسلمينها عيالنا فاكرينها هتخلق منهم رجالة.!!!
* كل السنين دي عاملينها مثل أعلى و شايفنها رمز العزة و الشرف و الكرامة و بعدين تطلع……. استغفر الله العظيم..
* حربية تعمل كده… أكيد أنا بحلم… أكيد أنا في كابوس،… لأ لأ لأ أكيد في حاجة غلط، تصدقوا بالله أول مرة في حياتي أقول كلام و أنا من جُـوَّايَا باتمنى إنه يطلع غلط،….بس إزاي؟ دا أنا شوفت بعيني..
* فيديوهات الخيانة مالية الدنيا إيشي يوتيوب على فيس بوك، على رصد، على الجزيرة، الفضيحة بجلاجل صوت وصورة و مع كل واحد بيدفع و حتى فيه منهم المجاني و اللي بيقبض منها و لا يدفعش.!!!
* حربية واخداها مقاولة تبيع و تقتل لكن ما بتقتلش غير عيالنا و بالأخص ولاد الحلال..،تصدقوا بالله إن الفاجرة اعترفت بنفسها قدام العالمة مريكا بالعلاقة الحميمة؟!!!، لأ… و بتفتخر كمان باللي بينهم!!! …… يااااااااه أمّـا أنا كُنت لَطخْ بشكل..

** شَعبِوُ النَّايِم /
** طب يا عم درويش، و العيال اللي استأمِنَّاهَا عليهم ياترى لِسَّه ولاد حَلَال و لا غَيَّرِت أخلَاقهم و بقوا ولاد حَرَام زَيَّـها؟ و هنعرف إزاي مين فيهم ابن حلال و مين فيهم ابن حرام؟ … نعملهم تحليل ولا إيه بالظبط؟…….طب ولما نعرف اللي بقوا ولاد حرام هنعمل فيهم إيه؟؟؟… دول مكتوبين بإسمنا…. هنشيلهم إزاي من البطاقة العائلية و الرقم القومي؟

* دَروِيش حَيرَان /
* مِشْ محتاجة تحاليل، شوف مين بيكرهوا و يظلموا ولاد الحلال تعرف مين ولاد الحرام..

** شَعبِوُ النَّايِم /
** و هَنِعمِل إيه يَعنِي؟

* دَروِيش حَيرَان /
* نِعمِل الصَّح،…. حَق رَبِنَا … العَدل ….نِطَلَّقهَا و نَاخُد عِيَالنَا اللي لِسَّة فِيهُم أَمَل، و نتخلص من ولاد الحرام اللي حَوِّلِتهُم و نطهر البيت من النجاسة..

** شَعبِوُ النَّايِم /
** ماتقول حاجة يا جبناوي إيه رأيك في كلام درويش؟

*-* جَبَنَاَوِي قَـفـا /
*-* و الله يا اخوانا الموقف حرج…. وأ وأ وأ… و أنا مش بتاع مشاكل و حربية دي مُفتَرِيِّة، و بعدين الشيخ دَيُوسِي النُّوُرِي هو أدرى بالمسائل دي..

** شَعبِوُ النَّايِم /
** افتينا يا شيخ ديوسي حربية دي حكمها إيه بالضبط؟

*** دَيُوسِي النُّوُرِي / ” يرفع مبسم الشيشة من على فمه و يخرج الدخان منتشياً و ينتصب ممرراً يده على لحيته الضخمة “..
*** أولاً : اللي اتقتلوا و اللي بيتقتلوا و اللي هيتقتلوا حربية بتقتلهم بقدر الله، و لكل أجل كتاب، و لا راد لقضائه سبحانه، يبقى خلاص حربية مالها بقا؟..
*** ثانياً : لا يمكن الاعتماد على أفلام الفيديو لأنه لا يمكن أن نمرر فيه خيطاً بينها و بين كل طرف من الذين واقعوها حتى نبني عليه حكما صحيحاً..
*** ثالثاً : إيه المشكلة يعني في علاقتها بالنتن، انتوا ما تعرفوش إن ربنا أدخل عاهرة الجنة في كلب سقته، طب بالله عليكم حربية سقت و أطعمت ييجي مليون كلب، يعني داخلة الجنة حَدف، ربنا يجعلنا من بركاتك يا حربية قولوا آمين، و بعدين ما تنسوش إن اليهود جيرانا و النبي وصَّىَ على سابع جار..

-*- الواد عَبدُه غَبَاَ، القهوجي / ” يغير حجر الشيشة “
-*- تصدق يا سيدنا الشيخ ، من ساعة ما شوفت مسلسل حارة اليهود و لقتهم ناس طيبين و مِيه مِيه و باتمنى يرجعوا يعيشوا معانا تاني..
-*- يا بهوات ما تصدقوش الإخوان و العيال بتوع الثورة؟، أنا عارف الفولة و فاهم القصة كلها..
-*- الفيديوهات كلها متفبركة، جايبين واحدة شبهها بالضبط، صوتها زيها بالضبط، و لبسها زيها بالضبط، و جسمها زيها بالضبط، و حركاتها زيها بالضبط، حتى البيت زي بيتها بالضبط و العفش زي عفشها بالضبط، و كل ولاد الحلال اللي ماتو دول إرهابيين مَوِّتوا نفسهم علشان يرجعوا يتهموا حربية،……. أي و الله زمبقولكوا كده..

*-* جَبَنَاَوِي قَـفـا /
*-* و لعلمكم بقا، كل الفيديوهات و التسجيلات و الاعترافات دي دليل على برائة حربية و حُسن نِيِّـتها، و أنا حاسس إنها صورت و سربت الفيديوهات دي مخصوص كخدمة وطنية، علشان الشباب المحروم يتسلى و يستمتع، و نحقق الاكتفاء الذاتي بالثقافة الوطنية، بدل ما الشباب يدور على فيديوهات و أفلام ثقافية غربية تُمَثِّل خَطَر على الأمن القومي..

-*- الواد عَبدُه غَبَاَ، القهوجي /
-*- يسلم فُمَّك يا أستاذ جبناوي، .. تعيش السكافة الوطنية و الأمن الكَومِي.

***** صوت قوي من خارج المقهى “حَـاَ يَاَ حمَاَر يَا عَرص “
يلتفت الجميع صوب باب المقهى و في الأذهان سؤال واحد.. من المقصود؟،.. يخيم السكون لحظة، …يقطع سكونهم صوت الواد عَبدُه غَبَاَ، القهوجي /
-*- ما تاخدوش في بَالكُوا، ده العَربَجِي عَسكَر بيسُوق حُمَارُه الأعوَر..
-*- حربية دِي أشرف من الشرف، و علشان كده هِيَّا أحلى حاجة في الدُنيَا و ده كلام الأديب الكبير توفيق الدِّئن، ربنا يطول عمره، لما وِقِف باللِبس العسكري و هُوَّا شايل صاروخ سام ستة على كتفه، فِي الأُمم المُتَحِدَة في تل أبيب نفسها و قال لأوباما قُدَام الرُوس كُلُّهُم ” أحلى من الشرف ما فيش”..

…. و هنا أخرج الجميع جوالاتهم يتصلون بالإسعاف فقد أُصيب الحاج درويش بجلطة مُفاجئة..

 

بقلمي

تعليقات

يتم التحميل..