“ماذا يعني انخفاض الجنيه المصري.؟؟؟”

0

ماذا يعني انخفاض الجنيه المصري.؟؟؟


======================
بعيداً عن تاريخ المقايضة و نشأة و تطور العملة و أنواع المعاملات تعالوا ببساطة شديدة نتعرف على خلاصة المسألة بما يناسب جميع الأفهام، إيه معنى الفلوس.؟؟؟

ببساطة علشان أديك بضاعة أو خدمة لازم تعطيني مقابلها بضاعة أو خدمة.
لكن انت عايز بضاعة الآن و أنا مش عايز بضاعتك أو خدمتك الآن و لو خزنتها هتكلفني نقل و تخزين و يمكن تفسد، يبقى إيه الحل.؟؟؟

الحل أديك البضاعة و تعطيني مستند ضمان بقيمة البضاعة علشان أضمن استردها أو أبادلها ببضاعة أو خدمة،.. لكن لسة فيه مشكلة..

المستند باسمك انت و أنا عايز بضاعة مختلفة من مكان تاني و في وقت تاني، و مش هعرف أجيب بيها بضاعة من واحد تاني مالوش علاقة بيك، يبقى إيه الحل.؟

الحل نعمل مستندات عامة بضمان الدولة ليها قيمة محددة نسميها الفلوس و نتعامل بيها، أديك بضاعة أو خدمة و تعطيني مستندات الضمان ” الفلوس ” بالعدد و القيمة اللي تساوي بضاعتي، و اديها لغيرك و أخذ منه البضاعة أو الخدمة اللي تلزمني، و بكده تبقى التعاملات سهلة و ميسورة..

الكلام ده معناه إن لازم تكون المستندات تساوي قيمة البضاعة أو الخدمة، يعني لازم عدد مستندات البيع و الشراء العامة ” الفلوس” اللي طبعتها الدولة بالكامل تساوي قيمة الناتج القومي من بضائع و خدمات في الدولة بالكامل..

و علشان أقربلك المثال:
تخيل لو دولة كل إنتاجها (1000 ) كيلوا سكر فقط لاغير و ما بتنتجش حاجة تاني، و كل مستندات النقد اللي طبعتها ” الفلوس” (1000) جنيه ، ده معناه إن كيلوا السكر في الدولة دي يساوي جنيه..
لكن لو نفس الدولة دي طبعت ( 100،000) جنيه و إنتاجها زي ما هوا (1000) كيلوا سكر كما هو، يبقى الكيلو أوتوماتيك يساوي (100) جنيه، و ده اللي بيسموه (التضخم)

طيب لو فيه دولة عايزة تسرقك و تاخد نصف مرتبك بالحداقة تعمل إيه.؟
ببساطة تضاعف طباعة المستندات للضعف فتنزل قيمة الفلوس النصف يبقى لو الدولة مشغلاك بمرتب (2000) جنيه هتاخد بيهم بضائع و خدمات بقيمة (1000) جنيه فقط لا غير و انت بيتهيألك إن مرتبك زي ما هوا، و تتوفر للدولة فائض مستندات نقد ” فلوس” تضحك بيها على اللي عايزة توهمهم إنها بتزود مرتباتهم و تزودلهم عدد الجنيهات اللي بيقبضوها و ” العدد في الليمون “..

طيب هو مش فيه حاجة اسمها سوق و عرض و طلب و ارتفاع و انخفاض أسعار للسلع في الداخل و الخارج.؟؟؟

أيوه فيه لكن ده موضوع تاني مالوش دعوة بقيمة العملة و علشان تفهم الفرق:-
لو الأسعار العالمية لسلعة بتستوردها زادت 10% و عُملِة بلدك محتفظة بقيميتها هيزيد عليك سعر السلعة دي غالباً 10% لكن لو عملتك نفسها بترخص و ينخسف بيها الأرض ممكن تلاقي السلعة زادت 100% و 200% و300% و حتى السلع اللي بتنخفض أسعارها عالمياً بتزيد عندك.!!!

تقدر تعرف الموضوع ده إزاي.؟؟؟
ببساطة تشوف عملات الدول الأخرى سعرها إيه بالنسبة لعملتك و خاصة العملة المرجعية العالمية و هي الآن ” الدولار” فلو مرتبك أيام مرسي مثلاً كان بيعادل 400 دولار و الآن يعادل 100 دولار فده معناه إن مرتبك انخفض إلى الربع و اتسرق ثلاثة أرباعه، و بعد ما كنت بتشتري بيه بضائع بقيمة 400 دولار هتشتري بنفس المبلغ بضائع بقيمة 100 دولار فقط لا غير و انت عمال تستغرب و تقول الأسعار غليت و الفلوس ما فيهاش بركة لإنك شايف نفسك بتقبض نفس عدد الجنيهات.
و الحقيقة إن عملتك هيا اللي رخصت، لأنك رخصت من قبلها لما قبلت بالعملاء و اللصوص يحكموا بلدك و ينهبوها و يصيبوا اقتصادها بالشلل الرباعي.

بقلمي

تعليقات

يتم التحميل..