“ما تفهمونيش غلط”..بقلم محمد عبدالعزيز

0

ما تفهمونيش غلط

قاعد ع المصطبة باستفسر من الحاج شعبوي أبو قرون و معانا الواد شرعاوي المناكف.

سألته إيه رأيك يابا الحاج في الانقلاب و خطف الرئيس الشرعي.؟، .. قالي: مرسي مربي دقنه و الجماعة في الجيش مش متعودين على اللحية و بيحبوها ناعمة.

قلتله الجيش ساب الحدود و نزل يقتل الشعب و يقبض على البنات و يهاجم المساجد.، .. قالي و ماله.؟ مسلمين محتلين للبلد من 1400 سنة ولازم يرجعوا المدينة المنورة اللي جم منها.

قلتله قادة الانقلاب كوشوا على الاقتصاد و أكلوه في كروشهم.،.. قالي هُمَّاَ أولى م الغريب.

قلتله الجيش قتل و هَجَّر أهلنا في سينا.، .. قالي و ماله.؟ علشان يريح إخواتنا اليهود منهم.

قلتله قائد الانقلاب العسكري فرط في حدودنا البحرية الشمالية و حقل غاز قيمته 200 مليار دولار لقبرص و إسرائيل.، .. 
قالي و ماله.؟ قبرص في أزمة اقتصادية و اللي كمه طويل يغطى أخوه، و إسرائيل يا كبد امها دفعت دم قلبها في قصف غزة و النبي وَصَّا على سابع جار.

قلتله جيشنا حاصر غزة و غَرَّق الحدود بالميه المالحة.، .. قالي و ماله.؟ علشان أمن إخواتنا اليهود و بعدين إحنا لايمكن ننسى عملة أبو جهاد الغزاوي لما كان محظور في غزة و انتهك حدودنا و عبر باللاندلوفر و وصل التحرير فك ميه و رجع، و أهي مية بميه و البادي أظلم.

قلتله جيشنا سايب السيسي بيبيع ثيران و صنافير و بيضيع مضيق ثيران من إيد مصر.، .. قالي و ماله.؟ المضيق مِضَيَّقْ على إسرائيل و المسيح قال أحبوا أعدائكم.

قلتله بيقولوا إن قائد الانقلاب هيفرط في حلايب و شلاتين، برضه.، .. قالي و ماله.؟ السوداني ابن النيل و المصري ابن النيل و ولاد النيل لازم يتنيِّلوا مع بعضيهم.

قلتله قائد الانقلاب العسكري فرط في النيل نفسه و ساب أثيوبيا تمنع الميه.، .. قالي و ماله.؟ خليهم يشربوا ميتهم، مسيرهم يتحظروا و يفوكوا و ناخد المجاري و نعالجها و نشربها.

قلتله جيشنا ضرب الشعب الليبي.، .. قالي دا تار قديم لأن الليبيين أحفاد الهكسوس اللي احتلوا مصر أيام الخديوي إخناتون؟؟؟

قلتله قائد الانقلاب اتآمر مع الحوثي و خذل الشعب اليمني.، .. قالي و ماله.؟ اليمانيين ثاروا على الراجل الصالح على عبد الله صالح و يستاهلوا. 

قلتله قائد الإنقلاب دعم بشار بالسلاح و كتايب قتالية في السر.، .. قالي و فيها إيه؟ بشار بيحكم سوريا و بيقتل السوريين، و من قَتِّلْ في شعبه فما ظَلَم.

قلتله قائد الانقلاب عمل تفريعة القناة و فقد تحويشة المصريين. ، .. قالي و ماله.؟ مين عارف لو فضلت الفلوس دي في إديهم كان ممكن يعملوا بيها إيه؟

الواد شرعاوي الإرهابي أبو لسان زالف عمال يبصلنا و عنيه بتدق شرار و أنا عارف و متوقع إنه هيغلط و مستعد له، و لسة بيفتح بقه و يقول: عار..
أنا ماكدبتش خبر و ما سيبتهوش يكمل الكلمة و رحت ساكه على بقه، عار إيه يا وَلَه.؟
قالي: بقول عارف يابا الحاج؟، أنا كنت الأول مفكر إن جيشنا خـوا..
برضه ما سيبتهوش يكمل و رحت ساكه على بقه، و قلتله: تقصد إيه يا وَلَهْ.؟ خوارج.؟
قالي: لا يابا الحاج أقصد كنت الأول مفكر إن جيشنا خـوادم الوطن.

قلتله: و لاقيتهم إيه بقا يا ابن شريفة الربعاوية.؟، قالي: لقيت معظمهم متنا..
رحت ساكه على بقه، و قلتله: تقصد إيه.؟ أكيد تقصد متنيلين على عينهم، يا قليل الأدب.؟
قالي: أقصد متنازلين عن حقوقنا بسهولة، و كل ما نقولهم الحقو العميل السيسي بيبعـ..
برضه أني ماكدبتش خبر و ما سيبتهوش يكمل و رحت ساكه على بقه..
قلتله: تقصد إيه.؟ أكيد تقصد بيبعتركوا، يا قليل الأدب.؟
قالي: أقصد بيبعـزق القرشين اللي في خزاين الدولة، و البلد فلست و بتنتهي و احنا عامالين نهاتي يا ناس فوقوا، و هما سايبين كل البلاوي دي، و رايحين يتنا..
قلتله اخرس و رحت ساكه على بقه تاني و أنا بأقوله هِيَّا حَصَّلِت الكلام ده يا قليل الأدب.؟
قالي يا ابا الحاج ماتفهمونيش غلط، أني بقول: إنهم سايبين كل البلاوي دي، و رايحين يتناقشوا في موضوع الإخوان، تجار دين وَلَّا إرهابيين.؟

تعليقات

يتم التحميل..